उज्यालो नेपाल- जिल्ला प्रहरी कार्यालय चितवनले अवैध क्रिप्टो करेन्सीको कारोबारमा संलग्न दुई जनालाई पक्राउ गरेको छ।
प्रहरीका अनुसार भरतपुर महानगरपालिका–२ मेलमिलाप टोलमा अवैध मुद्रा कारोबार भइरहेको भन्ने सूचनाका आधारमा खटिएको टोलीले उनीहरूलाई नियन्त्रणमा लिएको हो।
पक्राउ पर्नेमा सर्लाही राजबिराज नगरपालिका–१२ स्थायी घर भई हाल भरतपुर महानगरपालिका–२ बस्दै आएका २५ वर्षीय आशिष कुमार दास र भरतपुर २६ बस्ने २२ वर्षीया विनिता परियार रहेका छन्।
उनीहरूको साथबाट रु. १ लाख ९ हजार ९ सय ९५ नगदसहित विभिन्न बैंकका ३ थान चेकबुक, ४ थान एटीएम कार्ड, ५ थान मोबाइल, १ सेट कम्प्युटर, १ थान ल्यापटप, २ थान ट्याब, २ थान वाइफाइ राउटर, ६ थान नेपाली र २ थान भारतीय सिमकार्ड, ३ थान एसडी कार्ड/पेनड्राइभ तथा २ थान नेपाली नागरिकता बरामद गरिएको प्रहरीले जनाएको छ।
घटनाका सम्बन्धमा प्रहरीले थप अनुसन्धान अघि बढाएको जनाएको छ।
