Home Blog Page 36

जर्मनीका लागि नेपाली राजदूत रुपाखेतीविरुद्ध चितवन जिल्ला अदालतमा फौजदारी मुद्दा

चितवन –चितवन जिल्ला अदालतमा जर्मनीका लागि नेपाली राजदूत डा। शैल रुपाखेतीविरुद्ध जालसाजीको कसूरमा फौजदारी मुद्दा दायर भएको छ।भरतपुर महानगरपालिका–१० मा रहेको सासु विष्णु माया पौडेलको नाममा मुद्दा दायर भएको खुल्न आएको हो।

चितवन जिल्ला अदालतका सूचना अधिकारी अमृत विश्वकर्माले रुपाखेतीविरुद्ध जालसाजी मुद्दा दर्ता भएको पुष्टि गरे। “दुनियाँबादी फौजदारी मुद्दा दर्ता भएको देखिन्छ,” सूचना अधिकारी विश्वकर्माले बताए।

रुपाखेती हालको केपी ओली नेतृत्वको सरकारका पालामा जर्मनीका लागि नेपाली राजदूत पदमा नियुक्त भएका थिए। संसदीय सुनुवाइ प्रक्रिया पूरा गरी राष्ट्रपतिबाट अनुमोदन भएसँगै पदभार ग्रहण गरेका रुपाखेतीविरुद्ध दायर भएको दुनियाँबादी फौजदारी मुद्दाले कूटनीतिक वृत्तमा तरंग उत्पन्न गराएको छ।यस विषयमा प्रतिक्रिया लिन खोज्दा राजदूत रुपाखेतीसँग सम्पर्क हुन सकेन।

प्रशासनडटकमबाट

खोलामा पौडी खेल्न गएका ३ बालकको डुबेर मृत्यु

१८ चैत, हेटौंडा। मकवानपुरको उत्तरी क्षेत्रमा पर्ने इन्द्रसरोबर गाउँपालिका–३ स्थित सिस्नेरी खोलामा डुबेर ३ बालकको मृत्यु भएको छ ।

काभ्रे घर भई सिस्नेरी मामाघर आएका दुई बालक र सिस्नेरी डोडारेका एक बालकको सिस्नेरी बजार पछाडि खोलामा पौडी खेल्ने क्रममा आज अपराह्न करिब साढे ४ बजे डुबेर मृत्यु भएको घटनास्थलबाट इलाका प्रहरी कार्यालय भीमफेदी प्रमुख प्रहरी निरीक्षक ललिता ढकालले जानकारी दिइन् ।

इन्द्रसरोबर–३ सिस्नेरी डोडारेका श्यामबहादुर आचार्यका छोरा १४ वर्षीय सुशान्त आचार्य, काभ्रेको फूलबारी दाप्चा घर भएका १४ वर्षीय प्रमेश घोरासैनी र ११ वर्षीय प्रमाध घोरासैनीको डुबेर मृत्यु भएको ढकालले जानकारी दिएकी छन् । घोरासैनी दाजुभाइ हुन भने आचार्य मामाका छोरा हुन् ।

उनीहरु सिस्नेरी खोलाको ढुंगाको ओढारमा जमेको पानीमा घरबाट पौडी खेल्न भनेर गएको प्रहरी निरीक्षक ढकालले बताइन् । गत असोजमा कुलेखानी जलाशयको ड्यामका ढोका खोलेर पानी छोड्दा सिस्नेरी खोलामा आएको बाढीले ढुंगाको ओढारमा दह बनेको थियो ।

मृतक बालकको शव पोस्टमार्टम गर्न काठमाडौंस्थित अस्पताल पठाइएको ढकालले जानकारी दिइन् ।

भोलि सार्वजनिक बिदा

काठमाडौं । इस्लाम धर्मावलम्बीहरुको पर्व ईद उल फित्रको अवसरमा सरकारले भोलि सार्वजनिक बिदा निर्णय गरेको छ। गृह मन्त्रालयले भोलि सार्वजनिक बिदाको सूचना निकालेको हो।

मुस्लिम आयोगबाट पत्र आएपछि सरकारले भोलिको दिन बिदा दिने निर्णय गरेको हो। चन्द्रमा देखिएको दिनलाई आधार बनाएर मुस्लिम आयोगले सार्वजनिक बिदाको लागि सिफारिस गरेको हो।

सरकारले यसअघि नै बिदाको क्यालेन्डरमा इद उल फित्रलाई सार्वजनिक बिदामा राखिसकेको छ।

माधवपुरका सुत्केरीलाई वडा कार्यालयको कोशेली : कुखुराको भाले र घ्यू

रत्ननगर । पूर्वी चितवनको रत्ननगर नगरपालिका वडा नं १५ ले वडाभित्रका गर्भवती र सुत्केरीलाई पौष्टिक आहारको रुपमा कुखुराको भाले, घ्यू लगायतका पौष्टिक आहार उपलब्ध गराएको छ ।

सुरक्षित मातृत्व अन्तर्गत वडा कार्यालयले कुखुराको भाले, घ्यू सहित अण्डा, मह, चना, दाल, भटमास र मन्जन, ब्रस र साबुन वितरण गरेको हो । आधारभूत स्वास्थ्य केन्द्रमा आयोजित औपचारिक कार्यक्रमका बीच कार्यक्रमका प्रमुख अतिथि वडा नं १३ का वडाध्यक्ष पोटबहादुर घिमिरे र वडा नं १५ का वडाध्यक्ष आशिक तामाङले एक गर्भवती र १५ जना सुत्केरी आमालाई कुखुराको भाले सहित पौष्टिक आहार हस्तान्तरण गरेका थिए ।

सो वडाले विगत तीन बर्षदेखि कुखुराको भाले सहित पौष्टिक आहार वितरण गर्दै आएको छ । सो अबसरमा वडा नं १३ का वडाध्यक्ष घिमिरेले गर्भवती र सुत्केरी आमाहरुलाई पौष्टिक आहार वितरणले समाजमा सकारात्मक सन्देश प्रबाह गरेको बताए । कुखुराको भाले सहितको पौष्टिक आहार सामन्य विषय भएपनि यसले ठुलो अर्थ राख्ने उनको भनाई छ । वडा नं १५ का वडाध्यक्ष तामाङले आमा र बच्चा दुबैको स्वास्थ्य सुरक्षाका लागि पौष्टिक आहार वितरण गरिएको बताए ।

परिमाणका हिसाबले सामन्य भएपनि वडा कार्यालयले पौषण कार्यक्रमले वडाबासीको अपनोत्व गराउने भन्दै यसलाई आगामी बर्ष परिमार्जन गर्दै लैजाने बताए । वडा भित्रका सुनौलो भविश्यलाई स्वागत गर्ने र उनीहरुको भविश्व प्रति स्थानीय सरकार जिम्मेवार रहेको कुरा अनुभूति गराउन पौष्टिक आहार वितरण गरिएको उनको भनाई छ ।

वडा सदस्य रुकमाया परियारले स्वागत मन्तव्य राखेका सो कार्यक्रममा वडा सदस्यहरु इमप्रसाद पन्त, लीलादेवी पोखरेल, वडा सचिव नवराज तिवारी लगायतको उपस्थिति रहेको थियो । कार्यक्रम आधारभूत स्वास्थ्य केन्द्रकी अहेब मीना कुँवरले सञ्चालन गरेकी थिइन् ।

सौराहा चोकमा पूर्वी चितवनका पत्रकारको विरोध प्रदर्शन

चितवन। पूर्वी चितवनका पत्रकारले काठमाडौँमा भएको आन्दोलनमा समाचार सङ्कलन गर्ने क्रममा ज्यान गुमाएका पत्रकार सुरेश रजक र सञ्चारमाध्यममाथि भएको आक्रमणको विरोधमा आज प्रदर्शन गरेका छन् ।

शुक्रबार भएको हिंसात्मक प्रदर्शनका क्रममा एभिन्युज टेलिभिजनमा कार्यरत रजकको आगलागीमा परी मृत्यु भएको थियो ।

उक्त घटनाको विरोधस्वरुप आज बिहान रत्ननगरको सौराहा चोकमा पत्रकारहरुले प्रदर्शन गरेका हुन्।

राजावादीको आन्दोलनमा दुई जनाको मृत्यु, २२ जना घाइते, मृतकमध्ये एक पत्रकार

काठमाडौँ : राजावादीहरूले तीनकुनेमा गरेको प्रदर्शन उग्र हुँदा दुई जनाको मृत्यु भएको छ। एक जनाको गोली लागेर मृत्यु भएको हो। अर्का एक जनाको शव तीनकुनेमा प्रदर्शनकारीले आगो लगाइदिएको घरमा फेला परेको थियो।

प्रहरीका अनुसार घाँटीमा गोली लागेर उपचारका लागि शिक्षण अस्पताल महाराजगन्जमा उपचारका लागि लगिएका सविन महर्जनको मृत्यु भएको हो। उपचारका लागि ल्याउँदा नै उनको मृत्यु भइसकेको थियो। उनी २९ वर्षका हुन्।

प्रहरी बसेको भन्दै प्रदर्शनकारीले तोडफोड गर्दै आगो लगाइदिएको तीनकुनेको एक घरमा पत्रकारको शव फेला पर्यो। घरमा फेला परेको शव एभिन्यूज टेलिभिजनमा कार्यरत पत्रकार सुरेश रजक रहेको खुलेको छ। घरमा लागेको आगो निभाएपछि शव फेला परेको हो। शव डढेर चिन्न नसकिने अवस्थामा छ।

उनी घरबाट आन्दोलनको भिडियो खिच्न जानेक्रमम प्रदर्शनकारीले आगो लगाइदिएपछि घरमै फसेका थिए। प्रदर्शनका क्रममा २२ जना घाइते भएका थिए। घाइतेमध्ये दुई जनालाई गोली लागेको छ। गोली लागेका दुवै जनाको ट्रमा सेन्टरमा उपचार भइरहेको छ।

राजतन्त्रको माग गर्दै राजावादीहरूको आयोजनामा भएको आन्दोलन उग्र हुँदा प्रदर्शनकारीहरूले स्थानीयको घरमा आगो लगाइदिएका थिए। उनीहरूले एकीकृत समाजवादीको कार्यालयमा समेत आगो लगाइदिए। जडीबुटीमा रहेको जडीबुटी प्रशोधन कारखानामा समेत उनीहरूले आगो लगाएपछि कर्मचारीहरू भागेर ज्यान जोगाएका थिए।

प्रदर्शनकारीहरूले लुटपाट समेत गरेका थिए। उनीहरूले कोटेश्वरमा रहेको भाटभटेनी फोडेर सामान लुटेका थिए। प्रदर्शन उग्र भएपछि प्रदर्शनको आयोजना गरेका राजावादी नेताहरू प्रदर्शनस्थलबाट भागेका थिए भने प्रदर्शनकारीहरू अराजक भएका थिए।

त्रिशूली नदीमा ट्रक खस्दा चालकको मृत्यु, सहचालक घाइते

काठमाडौं । चितवनको भरतपुर–२९ स्थित चौध किलोमा एक ट्रक त्रिशूली नदीमा खस्दा चालककाे मृत्यु भएकाे छ भने सहचालक घाइते भएका छन् । नारायणगढबाट मुग्लिङ तर्फ जाँदै गरेको बा प्र०३–००१ ख ४८७४ नम्बरको कोइला बोकेको ट्रक आफै अनियन्त्रित भई त्रिशूली नदीमा खसेको हो ।

घटनालगत्तै प्रहरी चौकी जुगेडीबाट खटेको टोलीले चालक र सहचालकको उद्धार गरेको छ ।

यद्यपि चालक राम नारायण यादवको सरकारी अस्पताल भरतपुर बिहान ८ः २० बजे मृत्यु भएको बताइएको छ । सहचालक सुन्द्र कुमार यादवको भने उपचार जारी रहेको छ ।

सवारी साधनमा पूर्ण रूपमा क्षति भएको र ट्रकको आधा भाग त्रिशूली नदीमा डुबेको अवस्थामा रहेको बताइएको छ ।

कुलमानलाई बर्खास्त गर्ने सरकारको निर्णय; हितेन्द्र शाक्य नियुक्त

काठमाडौं । सरकारले विद्युत प्राधिकरणका कार्यकारी निर्देशक कुलमान घिसिङलाई बर्खास्त गर्ने निर्णय गरेको छ । सोमबार बसेको मन्त्रिपरिषदको बैठकले यस्तो निर्णय गरेको एक मन्त्रीले जानकारी दिए ।

घिसिङलाई २०७८ साउन २५ गतेको मन्त्रिपरिषद् बैठकले प्राधिकरणको कार्यकारी निर्देशकमा नियुक्त गर्ने निर्णय गरेको थियो। उनी दोस्रो कार्यकालका लागि प्राधिकरणमा नियुक्त भएका थिए। चार वर्षीय उनको कार्यकाल आगामी साउन २४ गते सकिँदै थियो।

तर, समयावधि नसकिँदै सरकारले उनलाई हटाएको हो। डेडिकेटेड र ट्रंक लाइनका कारण घिसिङ विवादित बन्दै आएका छन्। उद्योगहरूको लाइन काट्ने विषयमा घिसिङ र सरकारबीच जुहारी चल्दै आएको छ। यसअघि नै सरकारले हटाउनुभन्दा अगाडि तीनपटक स्पष्टीकरण सोधेको थियो ।

यसैबीच सरकारले विद्युत प्राधिकरणको कार्यकारी निर्देशक हितेन्द्र देव शाक्यलाई नियुक्त गरेको छ । ऊर्जा मन्त्रालयको प्रस्तावमा शाक्यलाई प्राधिकरणको कार्यकारी निर्देशकमा नियुक्त गरिएको हो।  शाक्य यसअघि पनि प्रधानमन्त्री केपी शर्मा ओली प्रधानमन्त्री हुँदा प्राधिकरणका निर्देशक बनेका थिए ।

सपना विद्यालयले मनायो सातौँ वार्षिकोत्सव तथा अभिभावक दिवस

रत्ननगर,चैत १०- पुर्वीचितवनको रत्ननगर-७ स्थित सौराहामा रहेको सपना विद्यालयको सातौँ वार्षिक उत्सव तथा अभिभावक दिवस सम्पन्न भएको छ। “बच्चाको भविष्य नै अभिभावकको भविष्य हो” भन्ने मुल नाराका साथ सम्पन्न सो कार्यक्रममा विद्यालय व्यवस्थापन समितिका अध्यक्ष वर्षा पुरी गिरी सभाध्यक्ष रहनुभएको थियो।

कार्यक्रममा रत्ननगर नगरपालिकाका शिक्षा अधिकारी नारायण वाग्ले प्रमुख अतिथिको रुपमा रहेका थिए। कार्यक्रममा बोल्दै प्रमुख अतिथी वाग्लेले सपना स्कूल अन्य विद्यालयभन्दा फरक रहेको र केवल किताबी शिक्षा मात्र नभई व्यवहारिक ज्ञान प्रदान गर्दै आएको बताउनुभयो।

त्यस्तै, कार्यक्रममा सपना भिलेज सोसल इम्प्याक्टका अध्यक्ष एवं विद्यालयका संरक्षक ध्रुव गिरीले विद्यालयको मूल नारा “बच्चाको भविष्य नै अभिभावकको भविष्य हो”लाई अगाडि सार्दै अभिभावक र समाजको भविष्य बालबालिकाको उज्ज्वल भविष्यसँग प्रत्यक्ष रूपमा जोडिएको कुरा व्यक्त गर्नुभयो। उहाँले भन्नुभयो, “बच्चाहरूको भविष्य राम्रो भयो भने मात्रै हामी गर्व गर्न सक्छौं। उनीहरू सक्षम, शिक्षित र संस्कारी भए मात्र समाजको भविष्य उज्ज्वल बन्छ।
बालबालिकाको भविष्य राम्रो बनाउनको लागि अहिले नै सही जग बसाल्न आवश्यक छ। यदि उनीहरूको आधार मजबुत भयो भने, जीवनमा अगाडि बढ्न र सफल बन्न सजिलो हुनेछ।” गिरिले बताउनुभयो।

कार्यक्रममा विशिष्ट अतिथिको रुपमा रत्ननगर वडा नं. ७ का वडा अध्यक्ष सजना महतो रहेका थिए। कार्यक्रममा बोल्दै महतोले कार्यक्रममा बोल्दै उनले भने,”सपना स्कूलले सिर्फ किताबी ज्ञान मात्र होइन, विद्यार्थीहरूलाई सही संस्कार सिकाउँदै थप जिम्मेवार नागरिक बनाउने कार्य गरिरहेको भन्दै विद्यालयको प्रयासको उच्च प्रशंसा गर्नुभयो।”

उहाँले सपना स्कूलको शिक्षण पद्धति र समाजमा पुर्याउँदै आएको सकारात्मक प्रभावलाई महत्त्वपूर्ण भन्दै भविष्यमा पनि यस अभियानलाई निरन्तरता दिनुपर्नेमा जोड दिनुभयो। कार्यक्रममा विद्यार्थीहरुले स्वागत गीत प्रस्तुत नृत्य, गायन तथा अन्य सांस्कृतिक कार्यक्रम प्रस्तुत गरेका थिए।

कार्यक्रममा अभिभावकतर्फ सुमन क्षेत्रीले आफ्नो मन्तव्य राखेका थिए । उनले सपना स्कूलमा आफ्ना बच्चा पढाउन पाएकोमा गर्व महसुस गरेको बताउनु भयो।” उनले सपना स्कूलले विद्यार्थीहरूलाई जिम्मेवार, संस्कारी र ज्ञानयुक्त बनाउने शिक्षा प्रदान गरिरहेको उल्लेख गर्दै विद्यालयप्रति आभार व्यक्त गर्नुभयो।

सपना भिलेज सोसल ईम्प्याक्टको मातहतमा संचालित सो विद्यालयले विगत लामो समय देखि विद्यार्थीहरूलाई जीवन उपयोगी सीप र नैतिक मूल्य सिकाउने संस्कारयुक्त शिक्षा प्रदान गर्ने उल्लेखनीय कार्य गरिरहेको छ।

उहाँले थप्दै भन्नुभयो कि सपना स्कूल प्राकृतिक वातावरणमा अवस्थित भएकाले यहाँका विद्यार्थीहरू स्वच्छ वातावरणमा अध्ययन गर्न पाउँछन्, जसले उनीहरूको मानसिक र शारीरिक विकासमा सकारात्मक प्रभाव पार्छ। प्रमुख अतिथिले विद्यालयको यस्तो विशिष्ट विशेषता अन्य विद्यालयका लागि पनि प्रेरणादायक रहेको बताउँदै विद्यालय परिवारलाई बधाई तथा शुभकामना व्यक्त गर्नुभयो।

कार्यक्रममा सभाध्यक्ष वर्षा पुरी गिरीले उपस्थित सम्पूर्ण अतिथि, शिक्षक, विद्यार्थी तथा अभिभावकप्रति आभार व्यक्त गर्दै धन्यवाद ज्ञापन गर्नुभयो। साथै,उहाँले शिक्षक र अभिभावकहरूको अथक प्रयासकै कारण सपना स्कूल आज यो स्थानमा आइपुगेको बताउनुभयो।

विद्यालयप्रति अभिभावकहरूले देखाउनु भएको विश्वासका लागि उहाँले विशेष धन्यवाद व्यक्त गर्दै
सपना भिलेज सोसल इम्प्याक्टको विद्यालयप्रतिको निरन्तर सहयोगको पनि चर्चा गर्नुका साथै विद्यालयलाई हरेक चरणमा साथ दिँदै आएकोमा सपना भिलेज सोसल इम्प्याक्टका अध्यक्ष ध्रुव गिरीलाई विशेष धन्यवाद व्यक्त गर्नुभयो।

साथै, उहाँले यदि विद्यालयमा कुनै कमजोरी देखिएमा, खुला मनले सुझाव दिन आग्रह गर्दै विद्यालय सधैं सुधार र विकासका लागि तयार रहेको कुरा व्यक्त गर्नुभयो।
कार्यक्रममा विद्यालयका पुर्व प्रधानाध्यापक सुर्य प्रसाद लामिछाने,सपना भिलेज सोसल ईम्प्याक्टका कार्यक्रम प्रमुख सुजन बस्नेत,रनपा-७ का वडा सदस्य माईली सुनार,सो विद्यालयकस संयोजक रोशनी तामाङ्ग लगायत अतिथिको रुपमा रहेका थिए।

वि.सं २०७३ सालमा स्थापित सो विद्यालयमा मन्टेश्वरी विधिबाट शिक्षण हुँदै आएको छ।
कक्षा १ सम्म अध्यापन हुने सो विद्यालयमा हाल ५ शिक्षक र ३ जना कर्मचारी कार्यरत रहेका छन।

चेपाङ संरक्षण केन्द्रलाई एसवाई प्यानलले गर्यो नगद सहित खाद्यान्न सहयोग

रत्ननगर । गामबेसीको चेपाङ संरक्षण केन्द्रलाई सोमबार नगद सहित खाद्यान्न सहयोग गरिएको छ । रत्ननगर वडा नं १४ पिठुवामा रहेको एसवाई प्यानल लिमिटेडले सामाजिक उत्तरदायित्व बहन गर्दै नगद एक लाख सहित ५ लाख बराबरको खाद्यान्न सहयोग गरेको हो।

केन्द्रमा आईतवार एक औपचारिक कार्यक्रमको आयोजना गरि कम्पनीका निर्देशक ली ह्वाङछुन, निर्दैशकहरु अनिल सापकोटा र अबिरल जिम्बाले केन्द्रका अध्यक्ष केपिकिरण शर्मालाई एक लाख रकमको चेक र खाद्यान्न हस्तान्तरण गरेका थिए ।

कार्यक्रममा बोल्दै केन्द्रका अध्यक्ष शर्माले केन्द्र स्थापनाको इतिहास देखि हालसम्म एसवाई प्यालनबाट भएको सहयोग सबैभन्दा ठुलो सहयोग भएको बताए । उनले कम्पनीले प्रदान गरेको एक लाख रुपैया चेपाङ बालबालिकाको शिक्षामा लगानी गर्ने बताए ।

सो अवसरमा कम्पनीका निर्देशक जिम्बाले कम्पनीले मासिक रुपमा यस्ता सहयोगको कार्यक्रमहरु गर्दै आईरहेको भएतापनि अहिले चेपाङ संरक्षण केन्द्रलाई गरिएको सहयोगले आफुहरुको आत्मसन्तुष्ट भएको बताए । यो सहयोगले लक्षित वर्गमा सहयोग पुगेको अनुभुती आफुले गरेको उनले सुनाए ।

यस्तै अतिथि तथा केन्द्रकि सल्लाहकार संगीता भट्टराईले चेपाङ बालबालिकाको चुलो बाल्न मद्दत गरेकोमा कम्पनी प्रति धन्यवाद व्यक्त गर्दै आगामी दिनमा पनि यस्तै सहयोगको अपेक्षा गरेको बताइन् ।

कार्यक्रममा कम्पनीका म्यानेजरहरु मनिष बानिया, मार्केटिङ म्यानेजर योगेश श्रेष्ठ, संजित थापामगर, सुवास श्रेष्ठ  लगायतको उपस्थिति रहेको थियो । सन २०१७ सालमा स्थापना भएको सो कम्पनीले १० प्रकारका प्यानल सहित झ्याल ढोका उत्पादन गर्दै आएको छ । सो कम्पनीका उत्पादन भएका सामग्रीहरु भारत त भूटानमा समेत निर्यात गरिदै आएको छ ।