रेखाले अमेरिकामा सन्तानलाई जन्म दिन लागेकी हुन् ?

0
67

नेपाली फिल्ममा गर्विलो पहिचान बनाएकी अभिनेत्री रेखा थापा आगामी फागुनमा आमा बन्दैछिन् । चार महिनाको गर्भ हुर्किरहेको समयमा उनले आफ्नो निर्माण समेत रहेको फिल्म ‘उपहार’मा नृत्यदेखि एक्सनसम्म गरेकी थिइन्, जुन फिल्म महाशिवरात्रीको दिन पारेर आगामी फागुन २५ गतेबाट प्रदर्शनमा आउँदैछ । फिल्म रिलिजकै महिनामा आमा पनि बन्न लागेकाले रेखा उत्साहित छिन् ।

तर, रेखाले आफ्नो पहिलो सन्तानलाई नेपालमा नभइ संयुक्त राज्य अमेरिकामा जन्म दिन लागेको खबर बाहिरिएको छ । शनिबार ‘रजतपट’ नामक टेलिभिजन कार्यक्रमले यसको खुलासा गरेको हो । उनी यसै साता श्रीमान् बलराम शाहीको साथमा अमेरिका जान लागेको समेत कार्यक्रममा जनाइएको छ । अमेरिका जाने भएपछि यतिबेला उनको भागको ‘उपहार’को डबिङ भैरहेको छ ।

अमेरिकामा सन्तान जन्माउँदा त्यहाँको राज्यबाट प्राप्त हुने केही फाइदा र सुविधा छन् । यदि, कुनै बच्चा अमेरिकामा जन्मियो भने ऊ स्वतः त्यहाँको नागरिक हुने प्रावधान रहेको छ । यसैले पनि केही नेपाली अभिनेत्रीहरुले अमेरिकामा नै सन्तानलाई जन्म दिएका छन् । अभिनेत्रीहरु जल शाह, निशा अधिकारी, ऋचा घिमिरे, विनिता बराल लगायतले अमेरिकामा सन्तानलाई जन्म दिएका थिए ।

अब रेखाले पनि पहिलो सन्तानलाई अमेरिकामा जन्म दिन लागेको चर्चा छ । तर, यस विषयमा उनले कुनै जानकारी दिएकी छैनन् । उनी यसअघि केही पटक अमेरिका पुगेर आइसकेकी छन् । उनका श्रीमान् त अमेरिकामा नै बस्ने गर्छन् । त्यहाँ उनको व्यवसाय रहेको बताइन्छ । रेखा घुमफिरलाई मात्रै अमेरिका जान लागेकी हुन् या सन्तानलाई जन्म दिन, त्यो भने अब समयले नै बताउनेछ ।

Previous article१६ वर्ष मुनिकालाई ‘वान् सिनेमाज्’ले ‘एनिमल’ देखाएपछि कारबाही सिफारिस
Next articleके गर्दैछन् यी चर्चित १० कलाकार ?