निराजन घिमिरे- रत्ननगरको वडा नं. १६ पिठुवामा रहेको हिमालयन तिम्ला गुरुङ समाजले विभिन्न कार्यक्रमको आयोजना गरेर तमु ल्होसार पर्व मनाएको छ। हरेक वर्ष तमु ल्होसारको अवसरमा विशेष कार्यक्रम आयोजना गर्दै आईरहेको समाजले यो वर्षपनि विभिन्न कार्यक्रम गरि पर्व मनाएको हो।
पर्वको अवसरमा पिठुवाको खैरेटी मुनालटोलमा रहेको समाजको सामुदायिक भवनमा सामुहिक भोजन, शुभकामना आदानप्रदान तथा सामुदायिक विद्यालयका विपन्न विद्यार्थीहरुलाई शैक्षिक सामाग्री वितरण गरिएको छ । समाजले भद्रकाली माध्यमिक विद्यालयका २५ जना छात्रछात्रालाई सामाग्री वितरण गरेको हो ।
कार्यक्रममा फरक क्षमताका भरत गुरुङलाई पुरस्कृत समेत गरिएको छ। हातखुट्टाले लेख्न नसक्ने भरतले मुखले कलम च्यापेर लेखेकै भरमा कक्षा १२ उतिर्ण गरि हाल स्नातक तहको अध्ययन गरिररहेका छन्। उनै भरतलाई रोहित घले स्मृति प्रतिष्ठान भरतपुरले नगद बिस हजार सहित पुरस्कृत गरेको हो। भरतको अध्ययनको लागी सम्पूर्ण खर्च रत्ननगर नगरपालिकाले उपलब्ध गराएको छ भने कलेज आउनजानको लागी वडा कार्यालयले व्यवस्थापन गर्ने वडाध्यक्ष हेमराज थापाले जानकारी दिए ।
संस्थाले प्रत्येक वर्ष लोसारको दिनमा विशेष कार्यक्रम आयोजना गर्दै आईरहेको छ । २०६२ सालमा गुरुङ समुदायको संस्कृतिको जगेर्ना गर्ने उद्देश्यले संस्थाको गठन गरिएको हो । स्थानीय गुरुङ समुदाय बाट चन्दा उठाएर जम्मा गरिएको ४ लाख ५० हजार रुपियाँले खरिद गरिएको घडेरीमा विभिन्न संघसंस्था र स्थानीय सरकार तथा सांसद विकास कोषबाट प्राप्त रकमले सामुदायिक भवनको निर्माण गरिएको पुर्व अध्यक्ष वुद्धिमान गुरुङले जानकारी दिए ।
तमु ल्होसार बिशेष गरी नेपाली पात्रोअनुसार पुष १५ का दिन मनाउने चलन छ। तमू भाषामा ल्हो (वर्ग) र सार (नयाँ पालुवा फुल्नु/फेर्नु ) भन्ने जनाउँदछ। पुरानो वर्गलाई बिदाई गर्दै नयाँ ल्हो (वर्ग) को आगमनको उपलक्ष्यमा नयाँवर्षको रुपमा यो चाड मनाईन्छ। तमूहरुको यस महान चाड ल्होसारको उपलक्ष्यमा एक अर्काप्रति “आँशिमाला” (शुभकामना) आदानप्रदान गर्ने चलन छ। तमुहरुमा कुन सालमा जन्मेको भन्दा पनि कुन ल्हो हो भन्ने कुरामा उमेरको गन्ति गर्दछ साथै विवाह, शुभ कामहरुको थालनी गर्दा पनि प्रायजसो ल्हो नै हेराएर गरिन्छ।
