साउदी अरेबियामा मृत्युदण्डबाट जोगिएर स्वदेश फर्केका धनुषाका उमेश यादव र उनको परिवारबीच झन्डै १४ वर्षपछि आज (सोमबार) पुनर्मिलन हुँदै छ।
अहिले काठमाडौं रहेका उमेश सोमबार बिहान १० बजे यति एयरको विमानबाट जनकपुर आउन लागेका हुन्।
उनलाई मृत्युदण्डको सजायबाट मुक्त गराउन पहल गरेका सामाजिक अभियन्ता सरोज रायका अनुसार जनकपुर विमानस्थलमा उमेशले सबभन्दा पहिले करिब १४ वर्षअघि बिछोड भएका श्रीमती मञ्जु तथा दुई छोरा १७ वर्षीय कमलेश र १३ वर्षीय रितेशसँग अंकमाल गर्नेछन्।
त्यसपछि उनी धनुषाको कमला नगरपालिका ५ पर्सास्थित आफ्नो घर पुगेर आमाबुवासँग खुसी साट्नेछन्।
घरमा झन्डै १४ वर्षदेखि छोरा आउने बाटो हेरिरहेका बुबा भोला यादव र आमा कुमदरदेवी छन्। घरपरिवारकै पालनपोषण र सुखका लागि उमेश वृद्ध आमाबुबा, श्रीमती र नाबालक दुई छोरालाई छाडेर सन् २००६ मा साउदी उडेका थिए। तर डेढ महिना पनि नहुँदै उनको जीवनमा दुर्भाग्य आइलाग्यो। अर्थात् सँगै काम गर्ने पाकिस्तानी नागरिक मोहम्मद लतिफ वासिरको हत्या आरोपमा उनी पक्राउ परे।
साउदीको जुबेल जेलमा कष्टकर जीवन बिताइरहेका उनीविरुद्ध १५ मे २०१८ मा जुबेल अदालतले मृत्युदण्डको सजाय सुनायो।
त्यसपछि मृत्यु कुरेर बसेका उनी सामाजिक अभियन्ता सरोज रायको प्रयासमा जुबेल अदालतबाट आमामाफी पाउन सफल भएपछि गत बुधबार बिहान काठमाडौं आइपुगेका हुन्।
सामाजिक अभियन्ता रायकै सल्लाहमा उनी विशेष कामले चार दिन काठमाडौंमै बसेर आज घर फर्किन लागेका हुन्। उनीसँग अभियन्ता राय पनि छन्।
चारदाजुभाइ रहेका उमेश साहिँला छोरा भए पनि आमाबुबाको सेवा गर्ने जिम्मा उनैले पाएका थिए। उमेश विदेशिएका बेला जेठो छोरा कमलेश ४ वर्षका थिए भने रितेश आमाकै गर्भमा थिए।
उनी विदेशबाट नफर्किएपछि श्रीमती मञ्जुले छोरालाई लिएर घर छाडेकी थिइन्। उनी धनुषाको महेन्द्रनगरमा स्थानीय एक उद्योगमा मजदुरी गरेर आफ्नो दुई छोरा पढाइरहेकी छन्। छोरा जेलमा र बुहारीले पनि घर छाडेपछि उमेशका आमाबुबा निकै कष्टकर जीवन बिताइरहेका थिए।
मृत्युको मुखबाट फुत्केर छोरा काठमाडौं फर्किसकेको खबरले निकै हर्षित आमाबुबा उनलाई हेर्न आतुर छन्। उनीहरूले विदेशबाट छोरा फर्केला र भेट गरौंला भन्ने आशा मारिसकेका थिए। लामो समयपछि मृत्यु छिचोल्दै घर फर्किन लागेका उमेशलाई हेर्न गाउँवासी समेत आतुर छन्।
आइतबार अभियन्ता रायले उमेशलाई परराष्ट्रमन्त्री प्रदीपकुमार ज्ञावालीसँग भेटघाट गराएका छन्। उमेशले आफूसँग साउदीको जुबेल जेलमा १४ वर्षभन्दा लामोसमयदेखि रहेका नेपाली नागरिक विवेक दहालको जीवनरक्षाको निम्ति पहल गरिदिन आग्रह गरेका छन्।
उनलाई पनि आफूलाई जस्तै मृत्युदण्डको सजाय सुनाइसकेकाले उनी मृत्यु कुरेर बसिरहेको उमेशले जानकारी गराए।
उमेशको मृत्युदण्डका विषयमा २ वर्षअघि समाचार सार्वजनिक भएपछि बचाउन अभियन्ता रायले चन्दा संकलन गरी मृतक पाकिस्तानी नागरिकका परिवारलाई ३० लाख पाकिस्तानी रुपैयाँ ब्लडमनी दिएपछि उनी मृत्युदण्डबाट जोगिएका हुन्।
यो पनि: मृत्युदण्डबाट जोगिएका उमेश भन्छन्ः सबैप्रति मेहरबान छु
