‘ए’ डिभिजनमा एनआरटी चौथो स्थानमा उक्लियो

राजेश परियारको दुई गोलसँगै न्युरोड टिम (एनआरटी) ले कतार एयरवेज सहिद स्मारक ‘ए’ डिभिजन लिगमा बिहीबार ब्रिगेड ब्वाइज क्लब बीबीसीलाई २–० ले पराजित गरेको छ।

नवौँ चरणको अन्तिम खेलमा बीबीसीलाई हराउँदै एनआरटी अंक तालिकाको चौँथो स्थानमा उक्लिएको छ। न्युरोड टिमले रुस्लान थ्री स्टारलाई १ अंकले पछि पारेको हो।

लिगमा ५ खेलमा जित, २ बराबरी र २ हार बेहोरेको एनआरटीको गत सिजन पुछारमा रहेको कारण २ अंक घटाइएको छ। बीबीसी भने ८ अंक जोड्दै ११ औं स्थानमा कायम छ।

खेलको सातौं मिनेटमा बीबीसीका लागि डेब्यु गरेका सुलभ मास्केको फ्रि–किक प्रहार पोस्टभन्दा माथिबाट बाहिरियो।

एनआरटीले ३२ औं मिनेटमा राजेशको गोलमा अग्रता लिएको थियो। दर्शन गुरुङको क्रसमा वैकल्पिक खेलाडीका रूपमा मैदानमा प्रवेश गरेका राजेशको प्रहार डिफेन्डर पदम भट्टराईलाई लाग्दै गोलमा परिणत भएको थियो।

दोस्रो हाफको सुरुवातमै एनआरटीले अग्रता दोब्बर पार्यो। ५२ औं मिनेटमा श्याम बाबुको पासमा राजेशले पेनाल्टी क्षेत्र भित्रबाट गरेको प्रहारलाई गोल रक्षकले रोक्ने कुनै अवसर पाएनन्।बीबीसीले खेलमा फर्कने थुप्रै मौका पाएपनी अवसर सदुपयोग गर्न सकेन।