उज्यालो नेपाल, पुष १२-  कालिकाको भीमोदय नमुना माध्यमिक विद्यालयको जारी स्वर्णमहोत्सवको छैटौं दिन सम्म एकहत्तर लाख बढी सहयोग संकलन भएको छ । विद्यालयले स्वर्ण महोत्सव मनाउन तथा विभिन्न पूर्वाधार निर्माणको लागी सहयोग आव्हान गरे अनुरुप चन्दा सहयोग संकलन भएको हो ।

विद्यालयका पुर्व विद्यार्थी, कर्मचारी, अभिभावक लगायत चन्दादाताले सो मात्राको सहयोग प्रदान गरेका हुन् । यसै गरि कालिका नगरपालिकाबाट पूर्वाधार निर्माण र कार्यक्रमको व्यवस्थापकीय खर्चको लागी ४० लाख प्राप्त हुने विहिबार आयोजित पत्रकार सम्मेलनमा जानकारी दिईयो ।

स्वर्णमहोत्सवको सन्दर्भमा विद्यालयमा हाल निर्माणाधीन गार्ड आवास सहितको एउटा स्वर्णद्वार, अर्को अतिरिक्त प्रवेशद्वार, विद्यालय कम्पाउण्ड, स्वर्ण स्तम्भ र स्वर्ण बाटिका निर्माणको काम अन्तिम चरणमा पुगेको र ति सबै काम सम्पन्न गर्नको लागी झन्डै ७० लाख खर्च हुने अनुमान गरिएको मूल आयोजक समिति संयोजक तथा विद्यालय व्यवस्थापन समिति अध्यक्ष अमृत श्रेष्ठले जानकारी दिए ।

त्यस्तै कार्यक्रमको व्यवस्थापकीय कार्यको लागी १० लाख खर्च हुने र बचत भएको रकम अक्षयकोष बनाएर दिगो आम्दानी श्रोतको रुपमा प्रयोग गरिने उनले जानकारी दिए ।

हाल शिक्षक कर्मचारीको सेवासुविधाको लागी निजिश्रोतबाट मासिक आठ लाख बढी रकम जुटाउनुपर्ने अवस्था रहेकोले बचत रकमबाट बन्ने अक्षयकोषबाट तलब भुक्तानीको लागी सहजता आउने उनले बताए । यसबाट सधैको अभिभावक चन्दाको मारलाई अन्त्य गर्न सहयोग पुग्ने उनले विश्वास व्यक्त गरे ।

भोली शुक्रबार पुर्व प्रधानमन्त्री तथा नेकपा एमालेका अध्यक्ष केपी शर्मा ओलीको प्रमुख आतिथ्यमा महोत्सवको मूल समारोह सम्पन्न हुनेछ । त्यसअघि विभिन्न झाँकी तथा बाजागाजा सहित शोभा र्याली निस्कनेछ । महोत्सवको मूल कार्यक्रममा रु २५ हजार माथि सहयोग प्रदान गर्ने सहयोगदाता, विद्यालय संस्थापक, पुर्व व्यवस्थापन समिति अध्यक्ष, पुर्व प्रधानाध्यपक, शिक्षक, खेलाडी लगायतलाई सम्मान, स्वर्णद्वार उद्घाटन, स्वर्ण स्मारिका विमोचन, स्वर्ण स्तम्भ अनावरण लगायतको कार्यक्रम हुनेछन् ।

रत्ननगर । चितवनको सौराहामा जारी १७औँ हात्ती तथा पर्यटन महोत्सव अन्तर्गत विहीबार भएको डुंगादौर प्रतियोगितामा खैरहनी नगरपालिकाले प्रतिनिधित्व गरेको डुंगा प्रथम भएको छ । चितवनका सात वटा स्थानीय तहले भाग लिएको सो प्रतियोगितामा रत्ननगर नगरपालिका द्धितीय र माडी नगरपालिका तृतीय भएको महोत्सवको आयोजक संस्था क्षेत्रीय होटल संघ सौराहाका कोषाध्यक्ष माधव दुवाडीले जानकारी दिए । सौराहा स्थित राप्ती नदीको एक हजार ५०० मिटरमा डुंगादौड प्रतियोगिता गरिएको हो ।

निर्धारित दुरी १२ मिनेट ४५ सेकेण्डमा पार गरी खैरहनीको प्रतिनिधित्व गरेका होमबहादुर कुमालले चलाएको डुंगा प्रथम, १२ मिनेट ४६ सेकेण्डमा निर्धारित दुरी पार गरी रत्ननगरको प्रतिनिधित्व गरेका आइते तामाङले चलाएको डुंगा द्धितीय र १२ मिनेट ४७ सेकेण्डमा निर्धारित दुरी पार गरी माडीको प्रतिनिधित्व गरेको दीपक बोटेले चलाएको डुंगा तृतीय भएको संघका महासचिव गुणराज थपलियाले जानकारी दिए ।

प्रतियोगितामा प्रथम, द्धितीय र तृतीय हुनेलाई महोत्सव समापन समारोहमा शिल्ड र नगद पुरस्कार प्रदान गरिने छ । महोत्सव अन्तर्गत बुधबार हात्ती सुन्दरी प्रतियोगिता गरिएको छ । प्रतियोगितामा भाग लिएका अन्य छ वटा हात्तीलाई पछि पार्दै सेल्फी कलीले हात्ती सुन्दरीको ताज पहिरीन सफल भएकी हो । हात्ती सुन्दरी प्रतियोगितामा सेल्फिकली सहित समृद्धिकली, लक्ष्मीकली, बिजुलीकली, रानीमायाकली, चम्पाकली र रिमझिमकलीले सहभागिता जनाएका थिए । प्रतियोगिताको निर्णय आँखाको सुन्दरता, हिँडाई, शरीरको बनावट, माउतेले भनेको मान्ने, नमान्ने र रौँको अवस्था नङ फुटे नफुटेको, हिँडाइ लगायतका बारेमा मूल्यांकन गरिएको थियो ।

महोत्सव रत्ननगर नगरपालिका–७ मैनाहाको चित्रसारी पुलनजिक चौरमा महोत्सव आयोजना गरिएको छ । क्रिसमस र अंग्रेजी नयाँ वर्षको अवसरमा पर्यटकलाई सौराहा आउने वातावरण बनाउने उद्देश्यले सन् २००४ मा हात्ती दौड कार्यक्रमको थालनी गरिएको थियो । कोरोनापछि लगातार तीन वर्ष रोकिएको यो कार्यक्रम यसपालि फेरि सुरु गरिएको संघका अध्यक्ष गंगा गिरीले बताए ।

क्षेत्रीय होटल संघ चितवन सौराहाले गर्दै आएको महोत्सवको मुख्य सहआयोजकमा युनाइटेड हात्ती सञ्चालन सहकारी संस्था र रेष्टुरेण्ट एण्ड बार एसोसिएशन चितवन छन् । कोरोना महामारी र आर्थिक मन्दीको चपेटामा परेको सौराहा सहित चितवनको पर्यटनलाई पुरानै अबस्थामा फर्काउन हात्ती महोत्सवका गतिविधिलाई परिमार्जन गरी हात्ती तथा पर्यटन महोत्सव गरिएको संघका उपाध्यक्ष तथा महोत्सवका संयोजक ओम पाण्डेले बताए ।

उज्यालो नेपाल, चितवन- कालिकाको पदमपुरमा रहेको भीमोदय माध्यमिक विद्यालयको स्वर्णमहोत्सव कार्यक्रम जारी छ । स्थापनाको ५३ औं वर्ष पुगेको अवसरमा आयोजित स्वर्णमहोत्सव कार्यक्रम यहि पौष छ गतेदेखि सुरु भएको हो । कार्यक्रमको पाँचौ दिन बुधबार विद्यालयमा विभिन्न समयमा योगदान दिने ५०७ जनालाई सम्मान गरिएको छ ।

सम्मानित हुनेहरुमा पुर्व अक्षयकोष दाता ७ जना, पुर्व शिक्षक १०६ जना, पुर्व विद्यालय व्यवस्थापन समिति सदस्य ३७ जना, पुर्व विद्यालय कर्मचारी ७ जना र २५००० सम्म सहयोग प्रदान गर्नुहुने ३५० जना गरि ५०७ जना छन् ।

कार्यक्रमका प्रमुख अतिथि बागमती प्रदेश सरकारका स्वास्थ्य मन्त्री उत्तम जोशी, सभाध्यक्ष  स्वर्णमहोत्सव मूल आयोजक समिति संयोजक एवम्  विद्यालय व्यवस्थापन समिति अध्यक्ष अमृत श्रेष्ठ, प्रधानाध्यापक इन्द्रराज पौडेल, वडा नं. ५ का वडाध्यक्ष दिपकबहादुर भट्टराई लगायतले सम्मानित हुनेहरुलाई खादा लगाएर सम्मानपत्र प्रदान गरेका थिए ।

कार्यक्रमलाई सम्बोधन गर्दै प्रमुख अतिथि मन्त्री जोशीले सरकारले लगानी गरे बमोजिम सामुदायिक विद्यालयले नतिजा निकाल्न नसक्दा चिन्ता थपिएको बताए । शिक्षक कर्मचारीको सेवा सुविधा र भौतिक निर्माणको लागी सरकारले ठुलो लगानी गरेको भएतापनि संस्थागत विद्यालय संगको प्रतिस्पर्धामा सामुदायिक विद्यालय निक्कै पछाडी रहेको उनले बताए ।

अर्को प्रसंगमा मन्त्री जोशीले कालिकाको नगर अस्पताल स्तरोन्नतिको लागी प्रदेश सरकारले केहि रकम विनियोजन गरेको र उपकरण खरिदमा पनि सहयोग गर्ने प्रतिबद्धता व्यक्त गरे ।

कार्यक्रममा शिक्षक तथा विद्यार्थीहरुले नृत्यकला समेत प्रस्तुत गरेका थिए । स्वर्णमहोत्सव कार्यक्रम यहि पौष १३ गते सम्म जारी रहनेछ । भोली ८:०० बजे प्रभातफेरी, पुर्व विद्यार्थी पुनर्मिलन कार्यक्रम, शैक्षिक बहस लगायतका कार्यक्रम रहनेछन् ।

छैटौ दिनको तस्विरहरु डाउनलोड गर्नको लागी यँहा क्लिक गर्नुहोला वा तल दिइएको क्युआर कोड स्क्यान गर्नुहोला !!

रत्ननगर । रत्ननगर खानेपानी तथा सरसफाई उपभोक्ता संस्थाले एक बर्षमा पाँच करोड बढी आम्दानी गरेको छ । मंगलबार सम्पन्न १३ औ बार्षिक साधारण सभामा प्रस्तुत गरिएको आर्थिक प्रतिवदन अनुसार आर्थिक बर्ष २०७९÷८० मा सो संस्थाले पाँच करोड ८ लाख २ हजार रूपैया आम्दानी गर्न सफल भएको हो ।

१९ शीर्षकमा आम्दानी गरेको सो संस्थाले पानी महसुलबाट मात्र ४ करोड ६६ लाख १ हजार रूपैया आम्दानी गरेको हो । ५ करोड ८ लाख २ हजार आम्दानी गरेको सो संस्थाले २ करोड ९९ लाख ३४ हजार खर्च कटाएर २ करोड ८ लाख मुनाफा गर्न सफल भएको छ ।

सो संस्थाले ५२ शीर्षकमा २ करोड ९९ लाख ३४ हजार खर्च गरेको आर्थिक प्रतिवेदनमा उल्लेख गरेको छ । २०५८ सालमा स्थापना भएको सो संस्थामा २०८० जेठ ४ गते बछौली खानेपानी तथा सरसफाई उपभोक्ता संस्था समायोजन गरी सेवा क्षेत्र विस्तार गरिएको थियो ।

१३ हजार ३३ उपभोक्ता रहेको सो संस्था अन्तर्गत संस्थागत धारा १५८, सामुहिक धारा २५६, विपन्न वर्ग धारा ८५५, निजी धारा ११ हजार ७६४ धारा संख्या रहेको छ । रत्ननगर नगरपालिकाका मेयर प्रलाद सापकोटा प्रमुख अतिथि रहेको सो कार्यक्रममा संस्थामा अध्यक्ष माधवप्रसाद अर्यालले चालू आर्थिक बर्षको नीति तथा कार्यक्रम भावि कार्ययोजना, सचिव प्रताप डल्लाकोटीले प्रगति प्रतिवेदन, कोषाध्यक्ष सरस्वती लामाले आर्थिक प्रतिवेदन तथा लेखा समिति संयोजक जीवनलाल नगरकोटीले आन्तरिक लेखा परीक्षण प्रतिवेदन प्रस्तुत गरेका थिए ।

संस्थाका अध्यक्ष अर्यालले खानेपानीको न्यूनतम महसुल ११० वटा घटाएर ८० रूपैया कायम गरिएको र मर्मत शुल्क १० रुपैया लिने निर्णय गरिएको जानकारी दिए ।

कार्यक्रममा रत्ननगर नगरपालिकाका उपमेयर यादवप्रसाद पाठक, संस्थापक मेयर नारायण वन, निवर्तमान उपमेयर विमला दुवाडी, नेपाली काँग्रेसकी नगर सचिव अनिता अर्याल, एमालेका नगर अध्यक्ष ईश्वरी अर्याल, माओेवादी केन्द्रका नगर अध्यक्ष श्याम बराल, एकीकृत समाजवादीका उपाध्यक्ष रामहरि अधिकारी, वडा नं ६ का वडाध्यक्ष किरण महतो, वडा नं ८ का वडाध्षक्ष कृष्ण चौधरी, वडा नं ९ का वडाध्यक्ष अनन्त अधिकारी, संस्थाका निवर्तमान अध्यक्ष भीष्मराज पौडेल लगायतले मन्तव्य राखेका थिए ।

संस्थाका उपाध्यक्ष कृष्णप्रसाद सापकोटा स्वागत मन्तव्य राखेको सो कार्यक्रम सचिव प्रताप डल्लाकोटीले सञ्चालन गरेका थिए । कार्यक्रममा पूर्व अध्यक्षहरु, सल्लाहाकार तथा संस्थाको संस्थागत विकासमा योगदान गरेकाहरुलाई सम्मान गरिएको थियो ।

खैरहनी,पौष ९- लघुवित्त संस्था पिडितहरु सशक्त आन्दोलनमा उत्रने भएका छन। आइतवार चितवनको खैरहनीमा आयोजित पीडितहरुको भेलामा उनिहरुले आफूहरुको माग सम्बोधन नगरेको भन्दै सरकारविरूद्ध सशक्त आन्दोलनमा उत्रने बताएका हुन।

भेलाले सुधा पाठकको अध्यक्षतामा संघर्ष समिति पुनर्गठन गरेको छ । त्यस्तै,सचिवमा शिवकान्त चौधरी रहेको समितिमा अन्य पदाधिकारी र सदस्य पछि चयन गर्ने भेलाले निर्णय गरेको छ ।

भेलालाई सम्बोधन गर्दै संघर्ष समिति गण्डकी इन्चार्ज धनकुमारी विकले अब जिल्ला/जिल्ला एकजुट भएर केन्द्रमा दबाब दिन जरूरी भएको बताईन। उनले ‘हाम्रो आन्दोलन शान्तिपूर्ण भएको कारणले गर्दा माग पूरा भएन, आफुहरु चरम शोषणमा परेका छौँ ।रोडमा कराएर मात्र भएन, हाम्रो पीडा सरकारले बुझेन र न्याय दिन सकेन, अब कडा आन्दोलनको तयारीमा रहेका छौ ।’ सरकारले वार्तामा भएको सहमतिमा हामी चुप लागेर बसेको भन्दै उनले अब चुप लागेर बस्ने अवस्था नरहेको बताइन् ।

भेलामा बागमती प्रदेश संयोजक छत्रबहादुर मोक्तानले न्यायका लागि एकजुट भएर सरकारलाई दबाब दिन जरूरी रहेको बताए । पीडितले न्याय पाउनुपर्नेमा सरकारले हाम्रो गाँस, बास, कपास नै खोसेको उनले बताए । दिदीबहिनीहरुले लघुवित्तबाट केही कर्जा लिएर काम गर्छु भन्दा सरकार किन निरीह भएको र लघुवित्तको कारणले गर्दा भूमिहीन हुन बाध्य भएको भन्ने बारेमा मोक्तानको आक्रोश थियो ।

फागुन १ गतेबाट काठमाडौँकेन्द्रित आन्दोलनको तयारीमा रहेको उनले जानकारी दिए । अब लघुवित्तीय संस्था घरमा आउने, फोन गर्ने गरेमा एकजुट भएर त्यसको सामना गर्ने सहभागीको जोड थियो ।

भेलामा सहभागी पिडितहरुले लघुवित्तले आफुहरुलाई धम्की दिने,परिवार नै बाटोमा ल्याईदिने र आत्महत्या गर्न बाध्य बनाउने गरेको समेत बताए।

लामो समय देखि लघुवित्त पिडितहरु नवसामन्तीको रुपमा खोलिएका लघुवित्त संस्था खारेज हुनुपर्ने, आमगरिब किसानलाई निःशुल्क ऋण दिनुपर्ने, जनपक्षीय मौद्रिक नीति लागू गर्नुपर्ने, लघुवित्तीय संस्थाले लगाएको सामूहिक ऋण मिनाहा गर्नुपर्ने, कालोसूची तथा धितो लिलाम खारेज गर्नुपर्ने लगायतका माग राखेर आन्दोलित छन् ।

चितवन, ९ पौष । भीमोदय नमुना माध्यमिक विद्यालयको जारी स्वर्णमहोत्सव समापनमा नेकपा एमालेका अध्यक्ष एवम् पूर्व प्रधानमन्त्री केपीशर्मा ओली आउने भएको छ । यस अघि राष्ट्रपति रामचन्द्र पौडेललाई विद्यालयले प्रमुख अतिथिको रुपमा निम्तो गरेको थियो ।

राष्ट्रपति पौडेलले समय व्यवस्थापनगर्न नसक्ने भएपछि प्रधानमन्त्री पुृष्पकमल दाहाल प्रचण्डलाई प्रमुख अतिथिको रुपमा निम्तो गरिएको थियो । प्रधानमन्त्री दाहालले निम्तो स्वीकार गरेपनि अन्तिम समयमा कार्यव्यस्तताका कारण कार्यक्रममा सहभागीहुन नसक्ने भएपछि प्रतिपक्षीदल नेकपा एमालेका अध्यक्ष ओलीलाई निम्तो गरिएको हो ।

नेकपा एमालेका नेता एवम वागमती प्रदेश सासंद कृष्ण सिलवाल कालिका नगर इन्चार्ज टिकाराज रिजाल लगायतका नेताहरु निम्तो बोकेर काठमाण्डौं पुगेका थिए । काठमाण्डौं स्थित ओलीको निवास पुगेर प्रमुख अतिथिका लागि निम्तो दिएका थिए । पौष १३ गते स्वर्णमहोत्सव समापनको लागि निम्तो दियौं वागमती प्रदेश सासंद समेत रहनुभएका एमाले नेता सिलवालले भन्नुभयो –‘ हाम्रो निम्तो उहाँले स्वीकारगर्नभयो, पक्का आउने निधो भयो ।’ पौष १३ गते १ बजे विद्यालय आइपुग्ने कार्यक्रम रहेको एमाले कालिका इन्चार्ज टिका रिजालले बताउनुभयो ।

अन्तको कार्यक्रम रद्द गरेर भएपनि उहाँ भीमोदयको स्वर्ण महोत्सवमा सहभागी हुने उहाँले जानकारी दिनुभयो । समापनको दिन बाजागाजा सहित विभिन्न जातजातिका झाँकी निकाल्ने, २५ हजार भन्दाबढी चन्दादिने दाताहरुलाई सम्मानगर्ने कार्यक्रम रहेको विद्यालयका प्रधानाध्यापक इन्द्रनाथ पौडेलले जानकारी दिनुभयो । उहाँका अनुसार विद्यालय संस्थापक, संस्थापक शिक्षक, पूर्व अध्यक्षहरु, पूर्व प्रधानाध्यापकहरुलाई समेत सम्मानगर्ने कार्यक्रम छ । यस्तै विद्यालयमा निर्माण स्वर्णद्धारा उद्घाटन, स्वर्ण स्मारिका विमोचन, स्वर्ण स्तम्भ अनावरण लगायतको कार्यक्रम छ ।

सप्ताहाव्यापी रुपमा स्वर्ण महोत्सव मनाउने अभियान जारी छ । भोली पौष १० गते कालिका नगरपालिका विद्यालयस्तरीय समुहगत नृत्य प्रतियोगिता आयोजना हुँदैछ । यस्तै भोली नै अन्तर समुह अभिभावक भौलिक लोकगीत तथा नृत्य प्रतियोगिता आयोजना हुँदैछ । यस्तै भोलीनै जिल्ला स्तरीय निबन्ध लेखन प्रतियोगिता आयोजना हुने स्वर्णमहोत्सव मूल समारोह समितिले जनाएको छ ।

यस्तै पौष ११ गते पूर्व शिक्षक, पूर्व विद्यालय व्यवस्थापन समितिलाई सम्मानगर्ने कार्यक्रम छ । यस्तै पूर्व अक्षयकोषदाताहरुलाई सम्मानगरिने कार्यक्रम छ । पौष ११ गतेनै २४ हजार सम्मका चन्दादाताहरुलाई सम्मानगर्ने कार्यक्रम छ ।यस्तै पौष १२ गते विहान ८ बजे प्रभातफेरी निकाल्ने कार्यक्रम छ । प्रभातफेरी कार्यक्रम पछि विहान ११ बजेपछि पूर्व विद्यार्थी पुर्ननिमलन कार्यक्रम आयोजना हुँदैछ ।

यस अघि जिल्ला स्तरीय विज्ञान तथा प्रविधि प्रदर्शनी प्रतियोगिताको आयोजना भइसकेको छ । यस्तै शिक्षकहरुबीच मैत्रीपूर्ण भलिवल प्रतियोगिता आयोजना भएका छ । आज आइतवार मात्रै रक्तदान तथा निशुल्क स्वास्थ्य परीक्षण शिविर समेत आयोजना गरिएको थियो ।

भरतपुर,पौष ९- भरतपुर महानगरपालिका १४४ जना स्काउट विद्यार्थीहरु दिक्षित भएका छन।

आइतवार भरतपुर -६ चोक बजारस्थित पारिजात ईङ्ग्लिस बोर्डिङ्ग स्कुलद्वारा आयोजित शितकालिन क्याम्प तथा दिक्षान्त समारोहमा स्काउट विद्यार्थी दिक्षित भएका हुन।

विद्यालयका प्राचार्य एवं ट्रुप अध्यक्ष अरविन्द प्रताप राणाको अध्यक्षता रहेको सो कार्यक्रममा भरतपुर महानगरपालिकाका उप-प्रमुख चित्रसेन अधिकारी प्रमुख अतिथिको रुपमा रहेका थिए।

कार्यक्रममा भरतपुर-६ चोकबजार स्थित पारिजात ईङ्ग्लिस बोर्डिङ्ग स्कुल,भरतपुर-१२ स्थित मोहन माध्यमिक विद्यालय र भरतपुर-९ स्थित स्टेप बाई स्टेप ईङ्ग्लिस बोर्डिङ्ग स्कुलका स्काउट विद्यार्थीहरुको सहभागीता रहेको थियो।

कार्यक्रममा बोल्दै प्रमुख अतिथी अधिकारीले सम्वृद्ध समाज निर्माणमा स्काउट भाइ बहिनिहरुको मह्त्वपुर्ण भुमिका रहदै आएको बताउनुभयो साथै उनले स्काउटिङ्गको अभियानमा महानगर सदैव सकारात्मक रहेको बताए।

कार्यक्रममा विशिष्ट अतिथिको रुपमा भरतपुर महानगरका शिक्षा शाखा प्रमुख महेन्द्र प्रसाद पौडेल विशिष्ट अतिथीको रुपमा रहेका थिए। त्यस्तै ,अतिथीको रुपमा नेपाल स्काउटका सहायक राष्ट्रिय प्रशिक्षक एवं संचारकर्मी सन्तोष बस्ताकोटी,सहायक राष्ट्रिय प्रशिक्षक शिव प्रसाद बराल,स्काउटर ईश्वर गुरुङ्ग,गणेश थापा,अशोक ढकाल,शिक्षक कृष्ण भट्ट,सरस्वती भण्डारी ,विद्यालय संचालक समितीका अध्यक्ष बिष्णु तिवारी लगायत रहेका थिए।

कार्यक्रममा स्काउटर उपेन्द्र घिमिरे र सरस्वती भण्डारीले स्काउट विद्यार्थीलाई दिक्षान्त गराउनुभएको थियो।

एक रात दुई दिनको सो कार्यक्रममा स्काउट विध्यार्थीहरुका लागि नेपाल स्काउटको ईतिहास,लर्ड बेडेन पावेल,लेडि बेडेन पावेलको जिवनी र संघर्ष,गाँठो सम्वन्धी ज्ञान साथै क्याम्प फायरको अर्थ,व्यवस्थापन र नियम सम्बन्धी जानकारी मुलक कक्षा संचालन भएको थियो। त्यस्तै, सोही कार्यक्रममा साँस्कृतिक कार्यक्रम साथै क्याम्प फायर,धर्मसभा लगायतका स्काउटिङ्ग गतिविधिहरु संचालन भएको थियो।

सो कार्यक्रममा चितवन स्मार्ट स्काउट क्र्युले सहजीकरण गरेको थियो। कार्यक्रम विद्यालयका स्काउट माष्टर उपेन्द्र घिमिरेले संचालन गर्नुभएको थियो।

चितवन – चितवनको सौराहामा हुने १७ औँ हात्ती महोत्सवको तयारी अन्तिम चरणमा पुगेको छ । पर्यटकीय नगरी सौराहामा यही पुस १० देखि १४ गतेसम्म सन्चालन हुने हात्ती महोत्सवको तयारी अन्तिम चरणमा पुगेको हो ।

उक्त महोत्सवको उद्घाटन गर्न अर्थमन्त्री डा.प्रकाश शरण महत आउने भएका छन्। १० गते बिहान ११ बजे नेस्नलपार्कबाट ४० देखी ५० वटा हात्तिको लस्कर सहित विभिन्न जातजातिका झाकी, बाजागाजाको साथमा महोत्सव उद्घाटन गर्ने तयारी भएको छ ।

हरेक अंग्रेजी नयाँ वर्षलाई स्वागत गर्न भन्दै पर्यटकीय नगरी सौराहामा हात्ती महोत्सव हुँदै आएको छ । कोरोनाका कारण स्थगन गरिएको हात्ती महोत्सव चार वर्षपछि पुनः सुरु गर्न लागिएको हो ।

हालसम्म महोत्सवको तयारी ९५ प्रतिशत सम्पन्न भईसकेको क्षेत्रीय होटल सङ्घ नेपाल चितवनको अध्यक्ष गंगा गिरीले बताए । अहिले महोत्सव अन्तर्गत स्थान व्यवस्थापन, प्रचारप्रसार, हात्तीलाई अभ्यास लगायत अन्य आन्तरिक तयारीको काम भईरहेको उनले बताए ।

यस बर्षको १७ औँ हात्ती महोत्सवलाई “हात्ती तथा पर्यटन महोत्सव” को नामाकरण गरिएको छ । लामो समयदेखि रोकिएको महोत्सव यसपटकदेखि नयाँ ढङ्गले गर्न लागिएको छ । पहिला गरिँदै आएको छावाको फुटबल, पोलो, हात्ती दौडजस्ता गतिविधिले हात्तीलाई दुःख हुने गरेको गुनासो बढेपछि यसवर्ष त्यस्ता गतिविधि नगर्ने उनले बताए ।

यसपटक हात्तीको वनभोज, हात्ती सुन्दरी प्रतियोगिताहरु गर्न लागेको उनको भनाई छ । हात्ती महोत्सवको मुख्य आकर्षण भनेको हात्ती सुन्दरी प्रतियोगिता भएको भन्दै उनले हात्तीको सरसफाइ, स्वास्थ्य र सजावटको मूल्याङ्कन गरी हात्तीलाई सुन्दरीको उपाधि दिइनेछ ।

महोत्सवमा विभिन्न किसिमका सांस्कृतिक कार्यक्रमहरु पनि हुने छन् भने महोत्सवमा आउने पाहुनाले थारु आदिबासीले बनाएका विभिन्न परिकारका खानेकुराहरु खान पाउने छन् । त्यस्तै पर्यटकलाई बस्न खान समस्या नहोस् भन्ने उदेश्यले पुर्वी चितवनका होटलहरुमा व्यवस्था गर्न लागिएको उनले बताए ।

यसपटक चित्रसारीको चौरमा महोत्सव गर्न लागिएको हो । यसअघि बाघमारा मध्यवर्ती सामुदायिक वनमा हात्ती महोत्सव हुँदै आएको थियो । अङ्ग्रेजी नयाँ वर्षको अवसर पारेर आयोजना गरिने महोत्सवले स्वदेशीसँगै विदेशी पर्यटक थप आकर्षित हुने छन् ।

उक्त महोत्सवमा आन्तरिक तथा बाह्य पर्यटक आउने हुँदा सौराहा र वरपर क्षेत्रका व्यवसायीलाई अर्थतन्त्रमा थप सहयोग पुग्ने विश्वास गरिएको गिरिले बताए । महोत्सवमा दैनिक १० हजार पर्यटक आउने अनुमान गरिएको छ । महोत्सव अवलोकन गर्न आउने दर्शकलाई शुल्क राखिएको छैन ।

महोत्सव बिह्नान ११ बजे शुरु भई बेलुका ८ बजे सम्म सन्चालन हुने छ । महोत्सव सन्चालनका लागि करिब १ करोड १० लाख रकम खर्च लाग्ने अनुमान गरिएको उनले बताए ।