मोरङको सुन्दरहरैँचा नगरपालिका–७ को केराघारीभित्र शनिबार एकै घरका २ जना नाबालिकाको शव फेला परेको छ।
नारायण न्यौपानेको केराघारीभित्र शनिबार दिउँसो साढे ४ बजेतिर दुई जना नाबालिकाको शव फेला परेको मोरङ प्रहरीका प्रवक्ता डिएसपी ज्ञानेन्द्रबहादुर बस्नेतले जानकारी दिए।
उनका अनुसार धनकुटाको पाख्रिबास नगरपालिका–४ डिकुरेका घर भएका ३१ वर्षीय अर्जुन कार्कीका छोरीहरु १ वर्षीया अर्पणा र ३ वर्षीया आयिका कार्की केराघारीभित्र मृत अवस्थामा फेला परेका हुन्।
उनीहरु धनकुटा घर भई सुन्दरहरैँचा–७ मालती टोलस्थित दिदी सीता रेग्मीको घरमा बस्दै आएका थिए। त्यहाँ अर्जनु उनकी श्रीमती २९ वर्षीया अस्मिता न्यौपाने र दुई छोरीसँगै बस्दै आएका थिए। उनीहरु बसेकै नजिक नयाँ घर बनाउँदै थिए।
केराघारीभित्र २ नाबालिकाको शव देखेपछि स्थानीयले प्रहरीलाई खबर गरे। शुक्रबार साँझ पती–पत्नीबीच विवाद भएको प्रारम्भिक अनुसन्धानबाट खुलेको बताउँदै, डिएसपी बस्नेतले भने, ‘विवाद भएपछि नाबालिका छोरीहरुलाई लिएर राति साढे ८ बजेतिर घरबाट उनी हिँडेकी थिइन्। शनिबार दिउँसो नाबालिकाको शव एकअर्काकालाई अँगालो मारेको अवस्थामा भेटियो। दिदी आयिकाले बाहिनी अर्पणालाई अँगालो मारेको अवस्थामा शव थियो।’
नाबालिकाको शव फेला परेपछि आमा अस्मिता सम्पर्कविहीन भएकी छन्। उनको खोजी तीव्र पारिएको छ। ‘घटनाको प्रकृति हेर्दा दुवै बालिकालाई विष खुवाएर मारे जस्तो देखिन्छ’ डिएसपी बस्नेतले भने।
बालिकाको शव फेला परेको स्थान नजिकै कीटनाशक औषधि ‘मेटासिट’ को बट्टा फेला परेको बताउँदै, डिएसपी बस्नेतले भने, ‘नाबालिकाको शरीरमा बाहिरी चोट देखिँदैन। घटना प्रकृति हेर्दा विष खुवाएर हत्या गरे जस्तो देखिन्छ। आमा सम्पर्कविहीन हुनुले पनि थप शंका उब्जाएको छ। बच्चाका बुवा हाम्रो सम्पर्कमा छन्।’
निर्माणाधीन घरमा पानी लगाउने विषयलाई लिएर पति–पत्नीबीच विवाद भएको र विवाद भएपछि २ जना छोरीलाई लिएर पत्नी हिँडेको अर्जुनलाई उद्धृत गर्दै प्रहरीले भन्यो।
मोरङ प्रहरी प्रमुख एसपी नवराज कार्की आफैं घटनास्थल पुगेर घटनाको थप अनुसन्धान अघि बढाएका छन्। शवलाई पोस्टमार्टमका लागि धरानस्थित बिपी कोइराला स्वास्थ्य विज्ञान प्रतिष्ठान पठाएर अनुसन्धान थालेको प्रहरीले जनाएको छ।
