काडमाडौं – ‘नेपाल आइडल सिजन २’ बाट चर्चामा आएकी अछामकी झुप्री भण्डारीले पहिलो गीत बजारमा ल्याएकी छिन् । उनको आवाजमा रहेको ‘सम्झी रुना रुना’ बोलको गीत सार्वजनिक गरिएको हो । यो गीत झुप्रीकै जीवनीमा आधारित छ । गीतका शब्द कमल सङ्घर्षले लेखेका हुन् भने पाण्डव विष्टले लय भरेका हुन् । त्यस्तै गीतलाई विनोद बाजुरालीले एरेन्ज गरेका छन् ।

भिडियोमा झुप्रीलाई पनि देख्न सकिन्छ भने उनको परिवार पनि देखाइएको छ । भिडियोमा झुप्रीका बुबा बलराम भण्डारी र आमा नामसरा भण्डारीलाई पनि देख्न सकिन्छ । विनोद याक्खा र विरेन तितुङ खिचेको भिडियोलाई वरुण रिजाल र कमल सङ्घर्षले निर्देशन गरेका हुन् ।

The post झुप्री भण्डारीको ‘सम्झी रुना रुना’ (भिडियो) appeared first on Purbeli News.

काठमाडौं / अभिनेत्री महिमा सिलवाल र उनकी बहिनी शर्मिलाको सवारी दुर्घटनामा परी मृत्यु भएको छ ।

काठमाडौंबाट चितवन जानेक्रममा दिदिबहिनी सवार बा ९८ प ७०५८ नम्बरको स्कुटरलाई लु २ ख १३५ नम्बरको बसले धादिङको गजुरी गाउँपालिका २, चाम्बासमा बुधबार साँझ ठक्कर दिएको र उपचारका क्रममा उनीहरुको मृत्यु भएको प्रहरीले जनाएको छ ।

भरतपुर महानगरपालिका–१२ शिवनगर स्थायी घर भएकी महिमाले ‘कारवाही’ चलचित्रबाट डेब्यु गरेकी थिइन् । त्यसयता उनले ‘अप्रिल फुल’, ‘चियर्स’, ‘दानव’, ‘जिग्लो’लगायत चलचित्रमा काम गरेकी थिइन् । प्रहरीले बससहित चालकलाई नियन्त्रणमा लिइ कारबाही चलाएको जनाएको छ ।

The post अभिनेत्री महिमा सिलवाल र उनकी बहिनीकाे सवारी दुर्घटनामा मृत्यु appeared first on Purbeli News.

अक्सिडेन्टल पब्लिक स्कुलको वार्षिक खेलकुद कार्यक्रम सम्पन्न भएकाे छ। ज्ञानेश्वर स्थित सानो गौचरणमा भएको कार्यक्रम विद्यालयका प्रधानाध्यापक टेक बहादुर पौडेलको सभापतित्वमा सम्पन्न भएको थियो।

कार्यक्रममा राष्ट्रिय खेलकुद परिषदका उपाध्यक्ष पीताम्बर तिमसिनाले दक्षिण एसियामा नेपालले खेलकुदको क्षेत्रमा चुनौती प्रस्तुत गरेको कुरा उल्लेख गर्दै विद्यालय नै खेलकुदको आधारभूमि भएको स्पष्ट पारे। शिक्षा राजनीति तथा अन्य क्षेत्रमा खेलकुद अनिवार्य भएको स्वीकार्दै नेपालमा प्रत्येक २ वा ४ वर्षमा आयोजना गरिने राष्ट्रिय वा अन्तर्राष्ट्रिय क्षेत्रमा नेपालको सहभागिता उदाहरणीय रहेको पनि उनले दाबी गरे।

कार्यक्रममा स्वागत मन्तव्य व्यक्त गर्दै विद्यालयका निर्देशक डी.बी निरौलाले विद्यार्थीहरुको चौतर्फी विकासका लागि यस्तो खेलकुदको आयोजना प्रत्येक वर्ष विद्यालयले गर्दै आएको बताए। कक्षा कोठाको सीमित ज्ञान भन्दा यस्तो कार्यक्रमले नै विद्यार्थीको मानसिक तथा शारीरिक विकास छिटो हुने प्रधानअध्यापक पौडेलले बताए।

फुटबल, क्रिकेट, कराते, दौड, खो.खो, कपर्दी, बासकेटबल, चम्चा रेस, रस्सी तानातान जस्ता रोचक खेल प्रस्तुत गर्दै विजेता टिम तथा विद्यार्थीलाई मेडल, ट्रफी, प्रमाणपत्र तथा शिल्ड प्रदान गरिएको थियो।

सशस्त्र प्रहरीले विभिन्न स्थानबाट भन्सार छलीको अवैध सामान बरामद गरेको छ। रौतहटको गौर नगरपालिका ८ स्थित सवगडाबाट एपीएफ टोलीले करीव एक लाख ६९ हजार रुपैयाँ बराबरको चोरीपैठारीको लत्ताकपडा बरामद गरेको छ।

भारतबाट अवैध रुपले मोटरसाईकलमा राखी नेपालतर्फ ल्याउँदै गरेको लत्ताकपडा सशस्त्र प्रहरी बल नेपाल नम्बर ११ गण हेक्व रौतहटबाट खटिएको एपीएफ टोलीले बरामद गरेको हो। सशस्त्रको टोलीले लत्ताकपडा ल्याउन प्रयोग भएको एक थान मोटरसाईकल समेत बरामद गरेको छ । बरामद लत्ताकपडा तथा मोटरसाईकल गौर भन्सार कार्यालयमा बुझाईएको छ।

यसैगरी रौतहट जिल्लाको गौर नगरपालिका २ स्थित महादेवपट्टिबाट एपीएफ टोलीले फागुन १ गते चोरीपैठारीको टायल १४ कार्टुन, आईसक्रिम कोन ३ कार्टुन तथा ५ केजी आईसक्रिम बनाउने केमिकल बरामद गरेको छ।भारतबाट अवैध रुपले मोटरसाइकल तथा साईकलमा राखी नेपालतर्फ ल्याउँदै गरेको उक्त सामान सशस्त्र प्रहरी बल नेपाल बोर्डर आउट पोष्ट गौरबाट खटिएको एपीएफ टोलीले बरामद गरेको हो।

एपीएफ टोलीले उक्त सामान ल्याउन प्रयोग भएको एक/एक थान मोटरसाइकल र साइकल समेत बरामद गरेको छ। एपीएफ टोलीले बरामद सामान, मोटरसाईकल र साईकल गौर भन्सार कार्यालयमा बुझाएको छ। उक्त सामानको भन्सार दाखिला मुल्य करीव दुई लाख ५ हजार रुपैयाँ रहेको छ।

पोखरामा खसआर्य संग्राहलय बन्ने भएको छ। क्षेत्री समाजले पोखराको नयाँबजारमा सो संग्रहालय बनाउन लागेको हो। संग्रहालयको विहीबार गण्डकी प्रदेशका आर्थिक मामिला तथा योजनामन्त्री किरण गुरुङले शिलान्यास गरे।

संग्रहालय बनाउन गण्डकी प्रदेश सरकारले पनि सहयोग गरेको छ। करिब ७ करोडको लागतमा संग्रहालय बन्ने निर्माण समितिका संयोजक प्रेमबहादुर जिसीले जानकारी दिए। खसआर्यको कला, संस्कृति, पुरातात्विक बस्तुहरुलाई देशैभरबाट संकलन गरि संग्रहालयमा राखिने उनले बताए।

कार्यक्रममा बोल्दै गण्डकी प्रदेशका अर्थमन्त्री किरण गुरुङले आदिवासी भन्ने होडको पछि नलाग्न र सबै जातजातिको सम्मान गर्नुपर्नेमा जोड दिए। प्रदेश सभा सांसद कुमार थापाले जातीय सद्भाव कायम गर्न यो संग्रहालय महत्वपूर्ण हुने बताए। अर्का सांसद कृष्ण थापाले सबैको सहभागितामा संग्रहालय बन्ने बताए। सांसद विन्दुकुमार थापाले विकास निर्माणको लागि पार्टीभन्दा माथि उठ्नुपर्नेमा जोड दिए।

क्षेत्री समाज नेपालका केन्द्रीय अध्यक्ष प्रा.डा.दिलबहादुर क्षेत्रीले समाजले सदैब सबै जातिको सम्मानका लागि आन्दोलन गरेकोले प्रसंग निकाले। पोखरा महानगरपालिका वडा नं ९ का अध्यक्ष रामराज लामिछानेले संग्रहालय निर्माणमा सहयोग गर्ने प्रतिवद्धता व्यक्त गरे।

नवनियुक्त प्रहरी महानिरीक्षक ठाकुरप्रसाद ज्ञवालीले बिहीबार सुरक्षा चुनौतीको सामना गर्न आक्रामक रुपमा प्रस्तुत हुन निर्देशन दिएका छन्।

सात वटै प्रदेशका निमित्त प्रमुखहरुसँग शान्ति सुरक्षा तथा समसामयिक विषयमा प्रहरी प्रधान कार्यालयबाट भिडियो कन्फ्रेन्समार्फत अन्तरक्रिया गरी सबै निमित्त प्रमुखहरुलाई  सो निर्देशन दिएका हुन्।

‘प्रहरी महानिरीक्षक ज्ञवालीले जस्तोसुकै सुरक्षा चुनौतीलाई समाधान गर्न प्रहरी सक्षम रहेको उल्लेख गर्दै त्यस्ता चुनौतीहरुको समाधान गर्न उच्च सतर्कताकासाथ प्रहरी परिचालन गरी आक्रामकरुपमा प्रस्तुत हुन निर्देशन दिनुभयो,’ नेपाल प्रहरी केन्द्रीय कार्यालयले बिहीबार जनाएको छ। ‘आवश्यकता अनुसार प्रदेश सरकार, सम्बन्धित निकाय, स्थानीय तह, स्थानीय प्रशासनसँग समेत समन्वय गरी उच्च प्रतिफल आउने गरी काम गर्नुपर्ने उहाँले बताउनुभयो।’

ज्ञवालीले कुनै पनि घटना, दुर्घटना भएमा तत्काल प्रहरी परिचालन गरी विधि तथा प्रक्रियासम्मत रुपमा कानुनी कारवाही अगाडि बढाउन निर्देशन दिएका थिए।

उनले सबै प्रदेशका प्रहरी प्रमुखहरुले आ–आफ्नो प्रदेशको सुरक्षा चुनौतीको पहिचान गरी उच्च रणनीतिकासाथ समस्या समाधानमा लाग्न निर्देशन दिएको केन्द्रीय कार्यालयले जनाएको छ।

‘प्रहरी कारवाहीको क्रममा मानवअधिकारको संरक्षण गर्नुपर्नेमा जोड दिँदै प्रहरी महानिरीक्षक ज्ञवालीले हिंसाजन्य क्रियाकलापमा प्रहरीको संलग्नता अक्षम्य हुने बताउनुभयो,’ प्रहरीले जनाएको छ। ‘राजमार्ग अवरोध, अवाञ्छित गतिविधिलगायत अन्य अपराधिक गतिविधि नियन्त्रणमा पूर्ण सक्रियताका साथ खटिनु पर्नेमा उहाँले जोड दिनुभयो।’

कोरियाली अधिकारीले चीनबाट फर्किएका एक सरकारी अधिकारीको हत्या गरेको दोङ–ए इल्बो पत्रिकालाई उदृत गर्दै डेलीमेलले जनाएको छ।

ती सरकारी अधिकारी हालै चीनबाट फर्किएका थिए। कोरोनाभाइरसको आशंकामा उनलाई क्वारेन्टाइनमा राखिएको थियो।

तर ती व्यक्ति सार्वजनिक स्थलमा नुहाउन गएपछि भाइरस फैलने त्रासका कारण गोली हानी उनको हत्या गरिएको बताइएको छ।

सर्वोच्च नेता किम जोङ उनको आदेशमा ती व्यक्तिको हत्या गरिएको दक्षिण कोरियाली पत्रिकाले दाबी गरेको छ।

उत्तर कोरियामा सूचनाको पहुँच कम भएकाले हालसम्म उत्तर कोरियामा कति कोरोनाभाइरसबाट संक्रमति भए भन्नेबारे तथ्यांक प्राप्त भएको छैन।

चीनको हुपेइ प्रान्तको वुहान शहरमा पहिलोपटक नयाँ कोरोनाभाइरस देखिएको थियो। २५ भन्दा बढी शहरमा फैलिएको यस भाइरसलाई विश्व स्वास्थ्य संगठनले कोभिद–१९ नाम दिएको छ।

बिहीबारसम्मको तथ्यांकअनुसार यस भाइरसबाट मृत्यु हुनेको संख्या १३ सयभन्दा बढी पुगेको छ। चीनबाहिर २ जनाको मृत्यु भएको छ।

यसको संक्रमण ६० हजारभन्दा बढीमा देखिएको छ। चीनबाहिर ५ सयको हाराहारीमा संक्रमित छन्। कोरोनाको खतरा मध्यनजर गर्दै डब्लुएचओले स्वास्थ्य आपतकालीन अवस्थाको घोषणा गरेको छ।

विश्व एक भएर यस भाइरसविरुद्ध लड्नुपर्ने डब्लुएचओको भनाइ छ।

पोखराको जिरोकिलोमिटरमा विहीबार अपरान्ह ४ः३० बजेतिर भएको सवारी दुर्घटनामा एकजनाको ज्यान गएको छ।

ग १ ज ४०९७ नम्बरको ट्याक्सीसँग ग १० प २५५५ नम्बरको मोटरसाइकल ठोक्किँदा मोटरसाइकलमा सवार दार्चुला घरभई हाल पोखरा–६,खहरे बस्ने ३५ वर्षीय पदमसिंह दडालको मृत्यु भएको हो।

उनलाई उपचारको क्रममा डाक्टरले मृत घोषित गरेका थिए।

प्रहरीले ट्याक्सी चालक पोखरा–८, न्यूरोड बस्ने २४ वर्षीय आशिष भुजेललाई नियन्त्रणमा लिएको छ। घटनाको अनुसन्धान भइरहेको प्रहरीको भनाई छ।

१ फागुन, काठमाडौं । कुवेतको एक निर्माणस्थलमा  पुरिएर ४ नेपालीको ज्यान गएको छ । ३ जना घाइते छन् ।

कुवेतको अल–मुत्ला क्षेत्रको निर्माणस्थलमा बुधबार खसेको बालुवा र ग्राभेलको ढिस्कोमा पुरिएर  ४ नेपालीको ज्यान गएको अरब टाइम्सले जनाएको छ । तर, घटनामा ज्यान गुमाउने नेपाली को–को हुन् भन्नेबारे भने खुलाइएको छैन ।

ढिस्कोमा पुरिएर घाइते ३  काे उपचार भइरहेकाे छ । समाचार अनुसार, घाइतेको पहिचान हुन बाँकी छ ।

ढिस्कोमा पुरिएका सबै कामदार चिनियाँ कम्पनीका हुन् ।

प्रत्यक्षदर्शीहरूले बताएअनुसार, निर्माणस्थलको ब्लक ५ मा ढल निर्माण गरिरहेका बेला ढिस्को खसेको थियो । घटनालगत्तै ७ लाई उद्धार गरेर अस्पताल लगिएकोमा ४ को ज्यान गएको अरब टाइम्सले जनाएको छ ।

१ फागुन, राजविराज । सप्तरीका एक युवकको भारतमा गोली प्रहार गरी हत्या गरिएको छ । जिल्लाको बोदेबर्साइन नगरपालिका वडा नम्बर १० खडगपुर अमरैयाका २२ वर्षीय डम्बर यादवको हत्या भएको हो ।

बोदेबर्साइन नगरपालिका–८ स्थित एक ग्यारेजमा काम गर्दै आएका यादव ग्यारेजकै कामका निम्ति भारतको झन्झारपुर गएका थिए । ग्यारेज मालिक सत्येन्द्र यादवले राखेको भारतीय नम्बरको स्कारपियो गाडीमा झन्झारपुर गएका उनीमाथि फर्किंदै गर्दा मंगलबार गोली प्रहार गरिएको हो ।

घटना भएको समयमा सत्येन्द्रका भाइ सुरेन्द्र र बोदेबर्साइन ८ का अनिल यादवसँगै रहेका थिए । सत्येन्द्रले नै प्रयोग गर्ने भारतीय नम्बर प्लेटको स्कारपियो लिएर गएका उनलाई घर फर्कने क्रममा पछाडिबाट मोटरसाइकलमा आएको समूहले गोली प्रहार गरेको पारिवारिक स्रोतको भनाइ छ ।

पहिलो गोली स्कारपियोको टायर र दोस्रो गोली डम्बरलाई लागेको थियो । डम्बरको शवलाई नेपाल ल्याएर बुधबार अन्तिम संस्कार गरिएको पारिवारिक स्रोतले जनाएको छ ।